Gschichdlichs vo mein Geburdsodd ROTH

Reiche Gschichd, karges Wabbm: Lediglich a rouds R schmigd dehn silbern-schwarzn Hohenzollernschild

Under dem Roudher Asül fandn vill Schudz

Ursprung des Nomers is ungeklärd - Kaiserliches Brivileg bod Verfolgdn Zufluchd
Asüland brachde Vorläufer der Indusdrie mied

Der Roudher Margdblatz um 1934      Klane Roudher Heimadkunde

ROUDH - Ess gibd Wabbm, däi gleichn ann Bilderbouch, und widder andere, däi kenner in ihrer Schlichdheid mid am Einkaufswagnchib gongurriern. Des Emblem der Schdad Roudh zähld, drodz anner reichn Gschichd, under seinesgleichn ned grod zu däi schillernsdn. Abber so is des hald mid hoheidlichn Dseichn, denner ihr Urschbrung ins Middelalder zrügreichd, als Herrschafdssymbole un andere "Eggdadn"wichdiger worn als gfällige Gschdaldung. In saner heidign Gschdald had des Roudher Wabbm immerhi seid 1427 Bschdand.

Ein R alsu, R wie Roudh. Roudh schdäid der Buchschdabm im Gevierd vo Silber un Schwaz. Ob freili däi Farb aah den Nomer erklärd, is ibberhabdd ned sicher, denn an underschiedlichn Deudunger fehlds ned.

Anerseids hads dou scho fräih aah wichdige Grichdsschdädde gebm, und däi "Grichdsfarb" - däi vo der Grichdssäule odder der Sidze - wor vo aldersher roudh. Andrerseids lag Roudh an bedeudenden Handelswegn, und aah Roudh- oder Roddschdrass für däi dereinsd so kosdbarn Salzsdransborde (der Begriff is mid "Roude" verwand) kemmerd als Ursprung fir den Nomer durchaus in Frach. Blausibl is abber ahh däi Herkunfd vo Rodung. Däi frängische Landnahme in den Urwäldern finded si schließli in viel Oddsnomer widder, so aah in Röddenbach/Rödhenbach odder Endunger wäi -reudh und -rod.

Roudh und sei Umland worn lang Bschdanddeil des bairischn Nordgaus, der schließli zsammer mid dem gsamdn, immer widder mal aufmübfign Herzogdum vom frängischn Kenichreich under Gondroll brachd worn is.

1007 dann schdaddede Keni Heinrich II. des vo ihm neigründedn Bisdum Bamberch mid umfangreichn, deils weid endlegenen Besidzunger aus, drunder ebn aah Roudh. Däi Fürsdbischöfe widderum sedzdn Vögde als Verwalder und Gerichdsherrn ei. Ersd worn des däi Grafn vo Abenberch vom Beginn des 13. Jahrhunderds oh däi Burggrafn vo Nernberch.

Un damid simmer widder bei de Hohenzollern, in denner sich so vill frängische Geschichdsschdräng bindeln. Des zielsschdrebige Geschlechd erwarb sich beganndli nach der Burggrafschafd aach däi Marggrafschafdn Beireidh/Gulmbach un Ansbach un glangde 1415 aff den Dhron des Kurfürsdendums Brandenburch. Roudh erlebde und erlidd under den Marggrafn vo Ansbach alle Häichn un Diefn der wechselvolln Zeidläufe mid, bis 1806, als der gsamde frängische Fleggerldebbich im neier Kenichreich Bayern affging. Un der Hindergrund des "R" is bis heid der Zollernschild, des silbern-schwadze Gevierd.

Ahner der Ansbacher Fürsdn woar der Erbauer jenes Schlosses Radibor, des heid kuldurelles Zendrum un Brungbau der Schdad is. Georch der Fromme, der vo 1528 bis 1543 regierde, wor durch Heirad und Erbschafdn zu ausdehdem Bsidz im Osdn kummer. Sei schlesischn Herzogdümer Obbeln, Radibor un Jächerndorf brachdn ihm suvill Erdroch ei, dasser si für sei neis Jagdschlößler a groußzügichege Gschdaldung leisdn had kenner. Dankbar gaber ihm den Nomer aner seiner Besidzunger.

Es gibd aah gschichdliche Bsonderheidn, däi Roudh vo andere Odde hervurhebn doud. Zu den kaiserlichn Brivilegien, däi der Schdad an der Rednidz im Lauf der Zeid verlieher worn sin, zählde das "Roudher Asül". Scho Ende des 14. Jahrhunderds beurkunded, behield es Güldigkeid bis 1799.

Als Asül odder "Freiung" galdn Zufluchdschdeddn - Kirchn, Blädz odder bsondere Odde - däi Schudz vur Verfolgung bodn ham. Des wor freili kaa Freibrief fir "Malefizverbrecher" wäi Schdraßnreiber, Brandschdifdr, Mörder odder Vergewaldicher, däi aah vo aner Freischdadd aus der ordndlichn Grichdsbarkeid ausglieferd wordn sin. Wohl abber konndn si Leid, däi unverhoffd in Schuldn gradn sin, un sugar Affegddäder in den Schudz vo ann Asylodd begebn.

Aff däi Ard is aah aner der Begründer des schbädern indusdrielln Afschdiegs nach Roudh kummer. Georg Fournier, Sohn vo ann aus Frangreich gflichdedn Hugenoddn, hadder sich 1571 aus dem Nernbercher Schulddurm gredded, in dem ma ihn wecher Zahlungsunfähigkeid gschdeckd hadd. Er is in Roudh bliebm und had däi "leonische Kunsd" miedbrachd, däi Drahdwirkerei, däi schbäder nebn viln andern, vurwiegnd medallverarbeidndn Schbardn, zur Grundlach des wirdschafdlichn Erfolgs worn is.

Von Dittmar Stühler, aus Nürnberger Nachrichten 9./10. Januar 1999
- ins fränkische übersetzt von Huberdus Jelitto Jan. 2008